Nel calendariu de celebraciones cíviques compartíes por sociedaes de tol mundu, hai una que cada mes de payares convoca a la sociedá en redol a la ciencia. Ye’l Día Mundial de la Ciencia pa la Paz y el Desenvolvimientu, establecíu nel 2001 pola Unesco pa fomentar el saber científicu y les sos aplicaciones concretes, y favorecer que los seres humanos puedan tener vides más plenes, dignes y llibres.
D’acordies con esti espíritu, el Gobiernu del Principáu orienta anguaño’l Día de les Ciencies Asturianes al ámbitu escolar. Más d’ochocientos escolares de 23 centros educativos van participar el vienres 7 de payares nun alcuentru con miembros de los colexos oficiales d’inxenieros n’informática d’Asturies, que van presentar la tema «El viaxe de les palabres pela rede. Los peligros del mundu dixital».
L’oxetivu ye tresmitir a la xente mozo que la ciencia ye un patrimoniu común en que la so práctica y en que’l so progresu tien de participar la sociedá al completu, reconociendo y incorporando los llogros de la cultura científica y la evolución tecnolóxica y contribuyendo de manera crítica y xenerosa al so desenvolvimientu. L’actu va empezar a les 11:00 hores nel Teatru de Llaboral Ciudá de la Cultura (Xixón).
La Conseyería d’Educación, Cultura y Deporte preparó amás un material didácticu específicu en llingua asturiana y gallego-asturianu nel que se planteguen actividaes y esperiencies pa fomentar una convivencia dixital de calidá y concenciar sobre les consecuencies personales y socioafectives que puede provocar el mal usu de les Tecnoloxíes de la Información y la Comunicación. Esti material ta a disposición de tolos centros escolares na páxina web www.educastur.es.