La conseyera de Desenvolvimientu Rural y Recursos Naturales, María Jesús Álvarez, destacó güei en Navia la importancia de protexer les superficies arbolaes, tantu pola so función ambiental como económica y social. Álvarez realizó estes declaraciones mientres l’actu de celebración de Día d’Árbol nel espaciu llacustre de La Poza, entamáu pola Unión de Cooperatives Forestales d’Asturies, y al qu’asistieron alumnos de los colexos del conceyu, que llantaron árboles de distintes especies.
La conseyera sorrayó que los montes d’Asturies ocupen el 46% de la superficie rexonal -un porcentaxe cimeru al d’España y Europa- y acueyen 745 millones d’árboles: 325 de pies mayores (que’l so tueru supera los diez centímetros de diámetru) y 420 de pies menores (con un diámetru de tueru inferior a diez centímetro), según l’últimu inventariu forestal nacional realizáu pol Ministeriu d’Agricultura en 2012. Estes cifres reflexen que nel Principáu esisten 745 árboles per habitante. Les principales especies son castaños, hayas, carbayos, ocalitos, abedurios y pinos.
Según señaló Álvarez, el monte arboláu exerz un papel fundamental como regulador del ciclu de l’agua, frena los procesos de desertificación y erosión, ye un sumidoriu de CO2 y salvaguarda la biodiversidá d’especies animales y vexetales.
“La producción de madera y otros productos forestales como frutos, camperes, corteces, caza, hongos o plantes arumoses suponen una fonte d’ingresos y un xacimientu d’empléu de gran importancia nel mediu rural”, destacó la conseyera.
Amás, resaltó que la superficie arbolada apurre a la sociedá beneficios en forma de servicios, porque constitúi “el mediu aparente pa ciertes actividaes d’ociu como la caza, la pesca o les rellacionaes col turismu rural”
“Asturies tien el privilexu de tener montes d’estraordinaria guapura y enorme riqueza biolóxica, poblaos por árboles centenarios”, valoró la titular de Desenvolvimientu Rural.