Los hoteles asturianos recibieron a 138.311 turistes en mayu, un 5,6% más que’l mesmu mes de 2015, ente que les pernoctaciones crecieron un 7,6%, hasta algamar les 249.083.
Los datos publicaos güei pol Institutu Nacional d’Estadística (INE) confirmen, coles mesmes, l’enclín a l’alza del turismu internacional. Los hoteles del Principáu acoyeron a 32.372 viaxeros procedentes d’otros países y contabilizaron 55.063 nueches d’estancia, lo que supon medríes del 8,8% y el 16,1%, respectivamente.
De xineru a mayu, estos establecimientos recibieron a 507.174 turistes, un 4,1% más que nel mesmu períodu del añu anterior, ente que se rexistraron 932.469 pernoctaciones, lo que supon una medría del 5%.
La llegada de visitantes internacionales, con un total de 71.727, creció un 11,6% nos primeros cinco meses del añu. Les pernoctaciones (135.714) tamién reflexen una medría, nesti casu, del 19,7%.
Per otra parte, el personal emplegáu nos hoteles asturianos aumentó un 4,3% en mayu en comparanza col mesmu mes de 2015 y un 5,9% si toma abril como referencia.