Izquierda Xunida y la Xunta pola Defensa de la Llingua apuesta pola cooficialidá del asturianu como única alternativa realista pa la efectiva protección y promoción de la llingua asturiana. IX va sofitar la cooficialidá del asturianu na próxima reforma del Estatutu d’Autonomía, al entender que l’actual figura de “protección” demostró, claramente, el so fracasu como vía pa garantizar la pervivencia de la llingua vernácula. Y ye que, según el diputáu nacional d’IX y candidatu a la presidencia d’Asturies, Gaspar Llamzares, tres décades dempués de l’aprobación del Estatutu, la fórmula nun sirvió pa protexer los derechos individuales y colectivos de los asturianos.
Llamazares axuntóse esta mañana col voceru de la Xunta pola Defensa de la Llingua, Carlos Pulgar, coles mires de llegar a puntos d’alcuerdu pa establecer acciones que puedan ser incluyíes dientro de los programes electorales y el so posterior defensa nel Parlamentu d’Asturies. L’alcuentru, según esplicó Pulgar, va retrucar nes próximes selmanes col restu de fuerces polítiques asturianes.
La necesidá d’una nueva fórmula xurídica de protección de la llingua pasa, a xuiciu de Pulgar y de Llamazares pola cooficialidá del asturianu que, de nun ser protexíu de forma urxente va tar en peligru ciertu de desapaición nuna o dos décades. “Tenemos que poner especial atención a la necesidá de poner fin a la situación de discriminación llegal que los falantes d’asturianu tienen na sociedá por, ente otres coses, la falta d’oficialidá. Por eso, vamos proponer a toles organizaciones polítiques qu’incluyan de manera esplícita ente les propuestes de los sos programes que na nueva llexislatura fáigase tou lo necesario pa reabrir el procesu de reforma del Estatutu d’Autonomía”.
Na xunta tamién tuvieron Xulio Casáu, de la Xunta, y la diputada asturiana Emilia Vazquez, quien reivindicaron que l’usu del asturianu ye una cuestión d’enfrentamientos políticos sinón de derechos. Precisamente, esa reconocencia de los derechos ye trascendental a xuiciu de Pulgar yá que, aseguró, de nun llograse, “el futuru de la llingua va tar bien comprometíu nes próximes décades”.
Pa Gaspar Llamazares ye imprescindible’l cambéu lexislativu, vistu’l fracasu de la regulación que tao a valir nos postreros 30 años y que nun sirvió pa garantizar la pervivencia del asturianu nin tampoco pa dar respuesta a los derechos de los sos falantes. “Cualquier reforma del estatutu tendrá de protexer los derechos, individuales, sociales, colectivos y dientro d’ellos los derechos de los falantes n’Asturies del asturianu”.
El planteamientu, tantu de la Xunta pola Defensa de la Lingua como d’IX, tien que englobar acciones nel sistema educativu, na función pública y nos medios de comunicación, nesti casu con una especial atención al asturianu naquellos de titularidá pública rexonal.