Un total de 52.913 persones realizaron dalguna consulta nel Serviciu d’Atención Ciudadana (SAC) del Principáu mientres les primeres 16 selmanes d’anguaño, 36.442 d’elles na oficina d’Uviéu, 13.535 na de Xixón y otres 2.936 na d’Avilés, lo que supon una media de más de 472 diaries. Esti volume d’asistencia presencial amontar mientres el periodu que va del 7 de marzu al 23 d’abril, coincidiendo col plazu de presentación de les ayudes autonómiques al arriendu de vivienda y dos convocatories d’empléu de docentes n’Asturies y Castiella y Llión, en que se rexistraron 17.163 trámites, lo que representa una media cimera a los 600 diarios. Por oficines, Uviéu contabilizó 11.734 (68%), Xixón, 3.645 (31%) y Avilés 1.964 (11%).
Amás de los sos trés oficines, el SAC cunta col teléfonu 012, que recibió cerca de 230.000 llamaes a lo llargo de 2015, una media de 20.000 llamaes al mes.
La Conseyería de Presidencia y Participación Ciudadana, encargada de xestionar el SAC, llevó a cabu anguaño, mientres el mesmu periodu de 7 de marzu al 8 d’abril, una encuesta de prestu ente 20.000 usuarios d’esti serviciu. Según les sos resultancies, el 97,45% considera bona o bien bona l’asistencia recibida; un 98,50% valora d’igual manera la cencellez y claridá de les esplicaciones recibíes y el 82% opina lo mesmo sobre’l tiempu d’espera.
Amás, l’amabilidá, disposición ya interés del personal ye bien bonu pa un 81% de los encuestaos, ente que la valoración del espaciu y la comodidá de les oficines ye bona o bien bona pal 89%.
Les elevaes puntuaciones recibíes pol SAC nesta encuesta pon de manifiestu que’l Gobiernu del Principáu cunta con un serviciu d’atención útil, rápido y eficaz, que respuende de manera satisfactoria a les necesidaes de la ciudadanía, que resulta fundamental por cuenta de que esti serviciu funciona como una de los principales ventanos d’accesu a l’Alministración.
Al traviés del SAC, cualquier usuariu puede recibir información y llevar a cabu, ente otres, xestiones como:
– Solicitúes d’ayudes del salariu social básicu
– Certificaos d’eficiencia enerxética
– Solicitú de pensiones
– Tramitación de llicencies
– Presentación de quexes y reclamaciones
La ellaboración d’encuestes de prestu ye unu de los compromisos incluyíos nel paquete de midíes de rexeneración democrática aprobaes en noviembre de 2015 pol Conseyu de Gobiernu, qu’inclúi mediu centenar d’actuaciones estremaes en cinco bloques temáticos: Tresparencia y bon gobiernu; participación ciudadana; atención ciudadana; Gobiernu abiertu y evaluación de polítiques, y servicios públicos, y autoevaluación.