El Principáu yá axudicó esta llexislatura mil viviendes públiques d’arriendu, lo que supon que l’Executivu autonómicu concedió como media un pisu al día desque llegó al gobiernu. La conseyera de Bienestar Social y Vivienda, Graciela Blanco, sorrayó esta cifra mientres la entrega de la llave d’un pisu celebrada nel Conceyu de Teberga.
Nel conceyu recuperáronse dos viviendes, una l’apurrida güei, allugada en La Plaza, y otra na escuela de Urria, que quedó pa los procesos d’urxencia y emerxencia. La Conseyería de Bienestar Social y Vivienda invirtió más de 63.000 euros na rehabilitación d’estos inmuebles.
La titular de Bienestar Social destacó que l’Executivu autonómicu realizó un importante esfuerzu mientres esta llexislatura por que les families tengan opción a una vivienda digna y abonen un arriendu fayadizu a les sos circunstancies económiques, respondiendo asina a les necesidaes reales de los ciudadanos.
El Principáu cunta con un parque de 8.600 viviendes sociales destinaes a arriendu. D’elles, nos últimos dos años y mediu recuperáronse 792, con una inversión de 2,4 millones, dientro del plan de recuperación que punxo en marcha’l departamentu qu’encabeza Graciela Blanco. Nel marcu d’esi plan recuperáronse los dos viviendes de Teberga, que disponen de dos cuartos y una superficie útil de 57 metros cuadraos. Caúna cuenta con trasteru venceyáu y plaza de garaxe.
Servicios sociales
Per otra parte, Blanco recordó que’l Gobiernu autonómicu va destinar anguaño 103.279 euros al plan alcordáu p’atender les necesidaes d’ayuda a casa y otros servicios en Teberga, onde moren once persones que reciben dalguna prestación económica venceyada a la dependencia. Amás, cinco vecinos reciben el salariu social, con una nómina mensual de 2.474 euros.
El conceyu cunta con una residencia pa mayores con 29 places, toes ocupaes, y un centru de día con capacidá pa 18 usuarios.
El conceyu dispon, coles mesmes, d’un equipu d’intervención técnica de sofitu a la familia (EITAF), qu’actúa tamién en Grau, Candamo, Salas, Yernes y Tameza, Les Regueres, Proaza, Quirós y Santo Adriano. El pasáu añu atendió a 30 families con 51 menores.