La conseyera de Agroganadería y Recursos Autóctonos, María Jesús Álvarez, señaló güei que’l Principáu va aprobar esti mes el nuevu Plan de Xestión del Llobu, un documentu “que plantega cambeos de caláu que-y confieren más eficacia nel control de la especie”.
“El nuevu testu va dexar que el cazadores puedan collaborar nes xeres de control, a pesar de que la especie nun ye cinexética, y que la guardería de la conseyería atope un sofitu más activu nes guarderíes de los cotos rexonales de caza cuando se trate d’acciones nestos llugares”, sorrayó la titular de Agroganadería.
Álvarez compareció esta mañana ante la Comisión de Agroganadería y Recursos Autóctonos de la Xunta Xeneral del Principáu pa informar sobre’l cumplimientu d’una moción del plenu rellacionada coles demandes del sector ganaderu alrodiu de la xestión de montes y la fauna selvaxe. Mientres la so intervención, manifestó que toles iniciatives parlamentaries treslladáronse al nuevu Plan de Xestión del Llobu, que foi informáu pol Parlamentu asturianu. Amás, recordó que’l Conseyu del Llobu tamién analizó los cambeos realizaos y dio el so vistu bonu al documentu nuna xunta celebrada’l 12 de xineru.
El nuevu Plan de Xestión del Llobu, que va sustituyir al aprobáu en 2002, establez que’l Gobiernu del Principáu tendrá de desenvolver un reglamentu de tramitación de los daños causaos pola fauna montesa. Nesti sentíu, la conseyera esplicó que la so ellaboración “ye una consecuencia del procesu de revisión y actualización del reglamentu de caza”, nel qu’el so departamentu “trabayó intensamente”, pero qu’anguaño ta paralizáu porque’l Conseyu de Caza nun asumió la propuesta realizada.
Sicasí, la Dirección Xeneral de Recursos Naturales y representantes de distintos sectores afectaos caltienen xuntes periódiques pa realizar dellos cambeos y siguir cola propuesta de tramitación del nuevu reglamentu col mayor consensu posible.
Acotadures al llendo
Per otra parte, Álvarez señaló que les acotadures al llendo en zones de monte que sufrieron una quema forestal vienen regulaos nel artículu 66 de la Llei del Principáu d’Asturies 3/2004, de 23 de noviembre, de Montes y Ordenación Forestal. Amás, aportunó en que l’únicu propósitu d’esta midida ye “refaer la vexetación afectada”. “Cola acotadura namá búscase evitar la perda y el empobrecimiento del suelu afectáu, cuestión qu’a curtiu y mediu plazu resulta beneficiosa pa tolos colectivos que viven y trabayen nel mediu, ente ellos, el de los ganaderos”, argumentó.
La titular de Agroganadería apuntó que’l plazu mínimu d’acotadura qu’establez la lexislación ye d’un añu, qu’empieza a cuntar dende la fecha de publicación del resolvimientu nel BOPA y remata cuando la vexetación recuperóse. Trescurríu esi periodu, si compruébase que’l terrén yá ta refechu, llevántase l’acotadura, circunstancia prevista na norma que regula esta práctica.
Sía que non, la conseyera precisó que non tola superficie acutada ye oxetu d’aprovechamientu ganaderu. “Al contrariu, un bon númberu d’hectárees correspuenden a terrenales forestados, esto ye, superficies que nun yeren susceptibles d’aprovechamientu como pastio antes del quema nin la serán dempués”, sorrayó.
La Conseyería de Agroganadería resolvió favorablemente l’añu pasáu, col consensu de los ganaderos, más de 47 espedientes de llevantamientu d’acotadures parciales o totales, que suponen más de 35.500 hectárees afectaes.
Prevención de quemes
Tocantes a los llabores de prevención de quemes, la conseyera destacó que, magar la prórroga presupuestaria, en 2014 siguieron les actuaciones y llimpiáronse más de 1.400 kilómetros de senderos, 4.800 de faxes auxiliares en pistes y caminos y más de 200 hectárees de faxes perimetrales. Tou ello nel marcu de les subvenciones concedíes a los conceyos pa estes xeres.
La Dirección Xeneral de Política Forestal recibió’l pasáu añu 41 solicitúes pa quemes controlaes nun total de 203 hectárees. D’elles, aprobáronse 191 y quemáronse finalmente 155.