La conseyera de Fomentu, Ordenación del Territoriu y Mediu Ambiente, Belén Fernández, unvió esta mañana una carta al ministru de Facienda, Cristóbal Montoro, na que solicita información y reclama una defensa firme y rigorosa” sobre les ayudes al puertu d’El Musel. Esti pidimientu produzse dempués de que’l Gobiernu autonómicu conociera esta fin de selmana per los medios de comunicación que la Comisión Europea decidiría retirar al puertu d’El Musel la subvención concedida de 247,5 millones d’euros, 198 yá abonaos, pa la execución de les obres d’ampliación. Esta decisión adoptaríase n’analizando la Comisión l’informe unviáu pol Ministeriu de Facienda y Alministraciones Públiques, colos argumentos remanaos pol Tao frente al informe de la Oficina Antifraude de la Unión Europea (OLAF), qu’afirmaba irregularidaes y encamentaba esixir la devolución de les ayudes.
Pa la conseyera, esta defensa tamién tien de tar “bien documentada”, col fin de “llograr un cambéu radical de posición pola Comisión que dexe -como supongo que tanto l’Estáu como’l Principáu d’Asturies deseyamos-, evitar la corrección y judicialización del asuntu y devolver el prestíu a les instituciones nacionales, nestos momentos bien cuestionaes dende la Unión Europea”. Fernández considera necesaria esa defensa per parte del Gobiernu d’España, “sacantes dende esa instancia asumir los planteamientos conteníos nel informe de la OLAF y les consecuencies por ella encamentaes”.
Na so misiva, la titular de Fomentu repite al Estáu la necesidá de “pasar páxina al déficit d’información” y encamienta a tratar esta tema “con tresparencia, llealtá institucional y rigor na defensa de los intereses del Estáu y del puertu de Xixón”.
Nesti sentíu, el Gobiernu asturianu solicita recibir la documentación unviada pola Comisión Europea, na que supuestamente se motivaría la esixencia a El Musel de devolución de les ayudes europees y negaríase l’abonu de les rimaes. Tamién pide conocer les llínees emplegaes pol ministeriu pa la defensa de los intereses d’España y de El Musel el pasáu xunu ante la DG Regio frente al informe de la OLAF; según les llínees de defensa que d’equí p’arriba va utilizar l’Executivu español ante’l comuñal.
Belén Fernández recuerda na so carta que la noticia apaecida’l sábadu nos medios de comunicación, “mala ensin paliativos”, causó “malestar y plasmu” nel Gobiernu d’Asturies. Malestar porque, según esplica la titular de Fomentu, “a pesar de la repitida voluntá de cooperación que los amosemos pola trescendencia del Puertu de Xixón pal desenvolvimientu y crecedera en tolos niveles de la nuesa comunidá autónoma, asistimos de nuevu a un inadmitible xestu de desllealtá institucional, al nun comunicase nos por nengún mediu una decisión que’l so caláu esixía una acuciosa puesta en conocencia dende Gobiernu central, tantu al Principáu d’Asturies como a l’Autoridá Portuaria”. Y plasmu porque, “de confirmase los conteníos qu’apaecieron na información periodística, taríamos ante la más drástica de les posiciones que la Comisión Europea podría adoptar, que ye la de la devolución total de l’ayuda percibida y la cancelación del derechu a llograr la rimada, venceyada a l’apreciación d’irregularidaes tantu nel procesu de contratación y axudicación de les obres como nel control y xustificación del gastu”, señala Fernández.
La conseyera aprofia que, a la vista de la posición de la Unión Europea coincidente cola OLAF, “surdir numberosos interrogantes alrodiu de los argumentos qu’ustedes remanaríen en xunu ante la mesma, supuestamente en defensa de los intereses patrimoniales del Reinu d’España y de l’actuación de diverses instancies ministeriales y de l’Autoridá Portuaria de Xixón”.
Fernández conclúi treslladando nuevamente la “plena voluntá de cooperación” del Executivu asturianu, “con cuenta de caltener una canal permanente de trabayu y comunicación en redol a esti procesu de defensa d’intereses comunes, incorporando la imprescindible participación nel mesmu de l’Autoridá Portuaria de Xixón y el so conseyu d’alministración”.