El Gobiernu del Principáu defende una respuesta consensuada de too el Sistema Nacional de Salú y liderada pol Gobiernu d’España pa faer frente a la situación creada en Madrid pola andada puntual d’una técnica sanitaria col virus del ébola. Asina lo espresó esta tarde’l conseyeru de Sanidá, Faustino Blanco, na xunta del Conseyu Interterritorial del Sistema Nacional de Salú.
El conseyu quixo güei, sobremanera, “tresmitir a los ciudadanos la seguridá de que’l Gobiernu y les comunidaes autónomes trabayamos en toles midíes previstes, basaes n’evidencies científiques, en defensa de la salú y del interés xeneral nun marcu de coordinación y tresparencia máximes”, en palabres del conseyeru.
Blanco aseguró que toles comunidaes autónomes “tenemos de responder como una sola voz ante una situación que puede estropiar la imaxe del sistema públicu de salú español, que ye unu de los meyores del mundu, y que fixo que n’Europa se tea cuestionando la calidá de la sanidá pública española”.
“Nun tamos en principiu ante un problema de salú pública sinón ante una andada que se produció na Comunidá de Madrid pal que la sanidá pública española ta perfectamente preparáu”, recordó Blanco.
Ante la esmolición social xenerada, Sanidá considera que ye bien necesariu desenvolver una política diseñada col máximu rigor y la mayor tresparencia informativa nuna tema de tanta sensibilidá pa la opinión pública. “Queremos reforzar les actuaciones coordinaes ente’l Ministeriu de Sanidá, Servicios Sociales ya Igualdá y les autoridaes sanitaries de les comunidaes autónomes, demostrando la fortaleza del nuesu sistema públicu de salú”, y añedió que “creemos qu’esto s’hai de faer nel marcu de la Comisión Nacional de Salú Pública del Conseyu Interterritorial, qu’hai de ser l’ámbitu de contactu en tiempu real pal intercambiu d’información sensible rellacionada con esti casu”.
Blanco aportunó en que “la sanidá española esta perfectamente preparada p’atender mélica y clínicamente esta situación”, lo que nun ye incompatible cola necesidá de preparar pa responder de forma antemanada a les eventualidaes que se vaigan creando, siempres col marcu de los protocolos y directrices que marquen tantu la Organización Mundial de la Salú como la Unión Europea. Estos protocolos van ser revisaos “cuando se faiga precisu reorientar los posibles aspeutos, tantu de fondu como de procedimientu, que nun funcionaron bien hasta agora”.
El titular de Sanidá espunxo amás na xunta d’esta tarde que “Europa tien d’encetar los problemes de salú pública d’África y dexar de mirar pa otru llau, porque ente que esto nun asoceda vamos tar siempres espuestos a esti tipu de situaciones”. Por ello, comprometió’l so sofitu a la OMS, la Unión Europea y les organizaciones sanitaries que so los criterios d’estes instituciones tán operando nos países africanos afectaos pola alerta internacional por Ébola. “Esta iniciativa tien de tener la clara intención de comprometer de forma sostenida a los países de la Unión Europea colos problemes de salú pública d’África”, esplicó.
“Creemos necesariu, tamién, tresmitir a la opinión pública l’enfotu que los responsables de les distintes alministraciones públiques tenemos nos profesionales sanitarios, yá que cunten cola formación, la capacitación y la dedicación necesaries pa encarar cualquier problema de salú pública. Esa enfotu estender a los procedimientos que con ellos s’alcordaron, tantu no relativo a la información, como no referente a la revisión de los procesos d’atención y protocolos d’aislamientu, que se van basar nos estándares internacionales. Y, sía que non –añedió–, queremos que perciban la proximidá de los responsables institucionales p’articular cualquier iniciativa qu’ameyore la so seguridá y esos procedimientos”.
Magar que, colos datos na mano, España presenta un riesgu bien baxo pola ausencia de traces epidemiolóxiques en relación cola enfermedá pol virus del ébola, el Gobiernu y les comunidaes quixeron espresar la so voluntá de tomar les midíes de control y vixilancia epidemiolóxica, ensin remacariar medios nin esfuerzos, acordies con los criterios europeos y de la OMS.
De la mesma y ante la molición de la población pola posible estensión de la enfermedá, “queremos recordar a la sociedá que les alministraciones sanitaries cunten colos medios humanos y técnicos más fayadizos pa faer frente a cualquier situación que pueda plantegase. Por eso, faemos un llamamientu a la máxima responsabilidá d’instituciones, medios de comunicación y sociedá civil polo xeneral pa evitar un alarmismo que pueda resultar inxustificáu nun asuntu que merez el máximu rigor”, esplicó’l conseyeru, quien aseguró que’l Gobiernu d’España, “faciéndose ecu d’un pidimientu de Pedro Sanchez, tomó la decisión de crear una comisión interministerial dependiente de Moncloa y un grupu d’espertos, dende onde se va comunicar permanentemente a los ciudadanos la evolución de la situacion”.