La conseyera de Bienestar Social y Vivienda, Esther Díaz, apurrió esta mañana les llaves de cuatro viviendes en réxime d’arriendu nun actu celebráu nel salón de plenos del Conceyu quirosanu al qu’asistieron, amás, la directora xeneral de Vivienda, Ana Rivas, y l’alcalde, Ovidio García.
La conseyera repitió na so intervención que l’oxetivu del Gobiernu d’Asturies ye poner a disposición de la ciudadanía’l mayor númberu de viviendes vacantes y llegar al empar al mayor númberu de conceyos posible.
Trés de les viviendes formen parte d’una convocatoria de seis publicada en marzu, na qu’otres trés quedaron vacantes per falta de solicitantes. El Principáu invirtió nel arreglu de los seis viviendes 8.200 euros.
Los inmuebles tán allugaos en Bárzana, tienen ente unu y tres dormitorio, y una superficie útil d’ente 32,97 y 73,64 metros cuadraos. La renta d’estes viviendes sociales va afaese darréu a les circunstancies económiques y familiares de la unidá familiar axudicataria. A propuesta del Conceyu estableciérase la reserva d’una vivienda pa families numberoses.
Tamién s’apurrió esta mañana una vivienda procedente de la rehabilitación de l’antigua escuela de Salcedo. Esta casa tien 65,11 metros cuadraos y dos cuartos.