La comisión de xestión del Parque Nacional de los Picos d’Europa aprobó’l plan d’actividaes y el presupuestu de gastu p’anguaño, que supera los 4,8 millones d’euros. El proyectu, aprobáu con calter provisional na xunta celebrada güei n’Uviéu, foi ellaboráu polos trés codirectores del parque y tendrá de ser ratificáu pol patronatu.
La conseyera de Agroganadería y Recursos Autóctonos, María Jesús Álvarez, que presidió güei l’alcuentru, destacó que’l presupuestu busca un equilibriu, al pretender “aportaciones al caltenimientu d’un llugar únicu y singular, pero ensin escaecenos de que nesti parque hai homes y muyeres que trabayen nesti parque”.
Na xunta alcordóse que’l consorciu del parque apurra 98.000 euros al conveniu cola Confederación Hidrográfica del Cantábricu y el Conceyu de Cabrales pa la recuperación de la calidá ambiental del ríu Duje, en Tielve (Cabrales).
Tamién se van destinar 199.000 euros p’ameyorar l’hábitat del urogallo cantábricu. El consorciu va encargar de xestionar esta cantidá, correspondiente tantu a la so propia aportación como a la que realiza l’organismu autónomu Parques Nacionales al traviés de la Fundación Biodiversidá.
Coles mesmes, ta previstu invertir 273.000 euros en trabayos de prevención y estinción de quemes; 349.000 euros nel serviciu d’usu públicu nel parque; 213.000 euros nel serviciu de recoyida y xestión de basures del espaciu protexíu y 181.000 euros na ellaboración del estudiu previu y los trabayos de recuperación del llagu de Ándara, en Cantabria.
Tamién se va destinar una partida de 287.000 euros pal caltenimientu de pistes y caltenimientu d’infraestructures d’interés ganaderu. Dalgunes d’estes obres yá fueron aprobaes l’exerciciu anterior y tienen una nueva añalidá anguaño. Amás, van dedicase 150.000 euros a obra nueva y obra yá aprobada en roces de defensa contra quemes y meyora de camperes.
Per otru llau, tamién se retomen gastos pal fayadizu caltenimientu de los valores naturales del espaciu protexíu, criteriu fundamental de la so declaración xuntu col caltenimientu de los sos valores etnográficos, según pa la planificación de nueves inversiones. Destínense 22.000 euros a la ellaboración del mapa xeomorfolóxicu de la zona incorporada al parque nacional en 2015 y la maquetación del mapa integráu de xeomorfoloxía. Otros 20.000 euros van dedicar a la ellaboración del mapa de vexetación, esguila 1:10.000, de la zona incorporada.
Amás, va estudiase la influencia de determinaos trabayos selvícolas na rexeneración d’arandaneres, con un presupuestu envaloráu de 20.000 euros.
Aumentu de turistes
Per otru llau, na comisión de xestión, a la que tamién asistieron el conseyeru de Fomentu y Mediu Ambiente de Castiella y Llión, Antonio Silván, y la conseyera de Ganadería, Pesca y Desenvolvimientu Rural de Cantabria, Blanca Azucena Martínez Gómez, informóse de la medría del númberu de visites al parque mientres l’añu pasáu.
Asina, en 2014 pasaron pol parque natural más de 1.842.000 persones, frente a les 1.544.000 de 2013, lo que supon una medría de más del 19%. Na zona de los llagos de Cuadonga l’aumentu ronda’l 35% y en Valdeón, el 17%. Pela so parte, les visites a Fonte Dea crecieron percima del 10% y en Cabrales, un 6%.
Los miembros de la comisión tamién amosaron el so prestu pola decisión adoptada’l pasáu día 30 de xineru pol Conseyu de Ministros d’ampliar el Parque Nacional de los Picos d’Europa con terrenes de los conceyos de Peñamellera Alta y Peñamellera Baxa.