El director xeneral de Comerciu y Turismu, Julio González Zapico, presentó güei en Les Arriondes el nuevu Decretu de Turismu Activu a los empresarios del sector. La normativa, que naz del consensu del Gobiernu del Principáu colos axentes qu’integren el Conseyu Asesor de Turismu, va dexar afaer la normativa autonómica a la estatal.
Como principales novedaes, el decretu reconoz la modalidá de guíes de monte, oficiu de gran tradición nel Principáu, y facilita l’accesu a l’actividá, entainando los trámites alministrativos. Esti cambéu respuende al compromisu del Gobiernu del Principáu d’esaniciar les torgues empresariales y fomentar el emprendimiento, tal que reflexa tamién el Programa Estratéxicu de Turismu d’Asturies Empresta 2013-2015.
En materia de seguridá, el testu regula les demandes del sector y de los usuarios sobre seguros, tresportes, derechos y obligaciones de veceros y empreses, según la protección medioambiental y el desenvolvimientu sostenible del sector turísticu. Pela so parte, y ente les obligaciones qu’axusta, destaca la meyora de la formación tocantes a la calidá y seguridá por aciu xornaes y sesiones formatives de calter obligatoriu.
El decretu contempla la inclusión de 31 nueves actividaes de turismu activu, colo que’l Principáu pasa de cuntar con una ufierta real de 26 actividaes a una ufierta potencial de 57, ente les que destaquen novedaes como’l saltu base, snorkel, rafting, kitesurf y esquí acuáticu.
Na actualidá, el númberu total d’empreses de turismu activu nel Principáu ye de 138, de les cualos 113 son d’organización y 25 d’arriendu de material. Ente les actividaes con mayor ufierta destaquen el senderismo (14%), el piragüismu (9%), el surf (8%), el descensu de ribayos y la marcha a caballu (6%).