La Conseyería d’Educación y Cultura entamó, con motivu del Día Internacional de los Museos, que se celebra mañana miércoles, un ciclu de conferencies programáu sol lema ‘Museos y Paisaxes Culturales’, propuestu pol Conseyu Internacional de Museos (ICOMOS) y que fai referencia a una reflexón sobre la responsabilidá de los equipamientos museísticos escontra les redolaes de los que formen parte.
Les conferencies van tar impartíes por espertos d’oldeáu prestíu en distintos ámbitos del Paisaxe Cultural: xeógrafos, historiadores, arquiteutos, etcétera, y van tener llugar nel Muséu de Belles Artes y nel Muséu Arqueolóxicu.
El viceconseyeru de Cultura y Deporte, Vicente Domínguez, abre mañana’l ciclu (18.00 hores) nel Muséu Arqueolóxicu. Tres la presentación, el secretariu xeneral del Comité Español de ICOMOS, Víctor Fernández Salinas, profesor de Xeografía de la Universidá de Sevilla, va impartir la conferencia Los paisaxes culturales: aspeutos xenerales y una mirada dende Asturies.
La primer xornada del ciclu, que va tener continuidá hasta’l próximu día 25, va cerrar cola ponencia El Plan Nacional de Paisaxe Cultural, ufiertada por María Linarejos Cruz Pérez, coordinadora de los Planes Nacionales de Paisaxe Cultural del Institutu del Patrimoniu Cultural d’España.