El Serviciu de Consumu, dependiente de la Dirección Xeneral de Salú Pública, encamienta planiar les compres navidiegues cola abonda antelación, ellaborando un presupuestu y afaciendo los gastos a planiar. Mercar con una cierta anticipación va dexanos amás adquirir los productos a un preciu meyor y realizar les compres con mayor comodidá y ensin aglomeraciones.
Pa les comíes propies de la dómina, ye conveniente ellaborar con tiempu’l menú, comparar precios y nun dexar les compres pa última hora, consultando les feches de consumu y les condiciones de caltenimientu nel etiquetáu de los productos.
A la de adquirir un xuguete tien d’escoyese’l más fayadizu pa la edá y los gustos del menor y valorar los sos aspeutos educativos, buscando artículos que fomenten la participación activa nel xuegu. Tolos xuguetes tienen de tener el marcáu CE, que garantiza que cumple les esixencies europees de seguridá y nun supon nengún riesgu pal menor. De la mesma convien refugar aquellos productos que’l so etiquetáu, instrucciones d’usu y alvertencies sobre posibles riesgos nun figuren en castellán. Igualmente, ye conveniente comprobar que’l xuguete nun tien partes cortantes o punchantes nin pieces pequenes o xebrables que puedan suponer riesgu d’afuega.
El Serviciu de Consumu realiza campañes pa controlar la seguridá de xuguetes y productos de consumu característicos de la Navidá, qu’anguaño se centraron nos xuguetes eléctricos y a piles y nos peluches y otros productos pa ñácaros.
El ticket, la nuesa garantía Una vegada efectuada la compra ye importante esixir y guardar el ticket o factura, yá que van ser imprescindibles pa cualquier reclamación o pa faer efectiva la garantía del productu en casu de que presente dalgún defectu, según caltener les ufiertes y folletos publicitarios, que la so publicidá ye venceyante pa la empresa.
D’alcuerdu a la normativa nun esiste obligación llegal de devolver el dineru o camudar el productu sacantes sía defectuosu o nun cumpla les característiques anunciaes, polo que ye conveniente informase primeramente si l’establecimientu almite devoluciones y de los plazos y condiciones pa faelo.
El Serviciu de Consumu informa de que realizar les compres nos establecimientos xuntaos al Sistema Arbitral de Consumu garantiza una solución amistosa, rápida y gratuita de les potenciales reclamaciones. En tolos casos los establecimientos tienen de tener fueyes de reclamaciones a disposición del consumidor.
Si merca por Internet, fáigalo en sitios seguros
El comerciu electrónicu consolidóse como vezu de consumu y añu tres d’añu esperimenta una medría constante. Ye conveniente tener en cuenta qu’estes compres fáennos más vulnerables a posibles engaños o estafes, polo que s’encamienta cerciorase de la seguridá de la páxina, comprobando que la barra de direcciones empieza por https://, cola s de seguridá, o que tien el símbolu del candáu o llave a pie de páxina. Nesti sentíu ye importante aplicar el sentíu común, resabiar d’ufiertes imposibles y consultar les opiniones d’otros usuarios sobre’l vendedor.
Navidaes saludables y sostenibles
A lo último, la Dirección Xeneral de Salú Pública encamienta nun abandonar nestes feches los vezos saludables y procurar caltener una alimentación equilibrao, practicar actividá física de forma regular y moderar el consumu d’alcohol.
Col ánimu de contribuyir a una Navidá más sostenible y respetuosa col medioambiente, Consumu encamienta a reutilizar los envoltorios y adornos d’otros años y dixebrar correchamente les borrafes pal so posterior recicláu.