La conseyera d’Educación, Cultura y Deporte, Ana González, reclamó güei en Madrid que se retarde l’aplicación de la Llei Orgánica de Meyora de la Calidá Educativa (LOMCE) na ESO y el bachilleratu prevista pal cursu 2015-2016 pola falta de dineru pa la so implantación y l’escasez de tiempu pa tener llistos los desenvolvimientos curriculares nel plazu establecíu. Amás, la conseyera criticó’l despreciu a les autonomíes, a tola comunidá educativa y a les families” pola aprobación el pasáu 26 d’avientu en Conseyu de Ministros, del real decretu que regula’l currículu básicu de dambos ciclos educativos, ensin pasar primeramente pola Conferencia Sectorial d’Educación.
Ana González, qu’ufiertó güei una rueda de prensa nel Congresu de los Diputaos colos responsables d’Educación d’Andalucía, Cataluña y Canaries, criticó la precipitación del Ministeriu d’Educación total y absoluta, como yá la hubo en primaria”, onde “inda hai aspeutos normativos fundamentales que tán ensin desenvolver”, y repitió que “cuando nun s’acabó’l trabayu en primaria, tenemos que poner en marcha la secundaria y el bachilleratu, que ye muncho más complexa organizativamente”. El malestar del Principáu débese, amás, al fechu de que “los conseyeros de les comunidaes entá nun conocemos el documentu base sobre’l que tenemos que trabayar” y a partir del cual, van tener que desenvolver, ente en secundaria y bachilleratu, “116 desenvolvimientos curriculares, y eso cuntando a la baxa”, añedió.
La conseyera denunció, amás, la poca claridá nel presupuestu que va financiar l’aplicación de la llei. “Nun sabemos cuántu nos van a dar”, ensin escaecer que, “cada vez que nos dan una cantidá, camudar, colo cual a día de güei nun sabemos cuánto dineru vamos recibir per parte del ministeriu”. González recordó, amás, que’l financiamientu de la LOMCE provien del Fondu Social Européu, lo que significa que “el PP fai una reforma educativa estructural, sistémica, que considera fundamental y nun tien dineru pa pagala”. Na so opinión, “tendría de da-yos un pocu de vergüenza como Tao; el Gobiernu de Rajoy nun tien de considerar importante la educación y va pidir fuera’l dineru, pero amás pide de menos y xenerando delda a les comunidaes autónomes”.