El director xeneral de Salú Pública, Julio Bruno, caltuvo esta tarde una xunta colos responsables de los hospitales privaos d’Asturies pa tresllada-yos los protocolos vixentes pal manexu de cualquier casu sospechosu de ébola que pueda detectase na comunidá, de cuenta que tolos centros sanitarios del Principáu sepan cómo tienen d’actuar neses circunstancies.
“Nun tamos ante un riesgu elevao pal Principáu, sinón ante una andada puntual que se dio en Madrid y qu’afecta a personal sanitario”, esplicó Bruno.
Al so xuiciu, la sanidá asturiana ta perfectamente preparada p’atender esta situación dende’l puntu de vista médicu, clínicu y dende la prevención. “Esto nun ye incompatible cola necesidá de que teamos preparaos pa responder de forma antemanada a les eventualidaes que puedan surdir, siempres nel marcu de los protocolos y directrices que marquen la Organización Mundial de la Salú y l’Unión Europea”, señaló.
El responsable de Salú Pública aportunó en que los citaos protocolos son frutu del consensu ente profesionales y que pueden ameyorase cuando sía precisu pa reorientar aspeutos tantu de forma como de procedimientu.
“Magar que Asturies presenta un riesgu bien baxo, ye precisu adoptar midíes de control y vixilancia epidemiolóxica, acordies con los criterios alcordaos na última xunta del Conseyu Interterritorial del Sistema Nacional de Salú, basaos de la mesma nos criterios europeos y de la OMS”, apuntó’l director xeneral.
Bruno tamién xulga imprescindible tresmitir a la opinión pública enfotu nos profesionales sanitarios, “que cunten cola formación, la capacitación y la dedicación necesaries pa encarar cualquier problema de salú pública”. “Esa enfotu estender a los procedimientos consensuaos, tantu no rellacionao cola información, como no referente a la revisión de los procesos d’atención y protocolos d’aislamientu, que se van basar nos estándares internacionales”, precisó.