El conseyeru d’Educación y Cultura, Genaro Alonso, treslladó güei a los equipos directivos de tolos centros docentes qu’imparten Educación Primaria, tantu de titularidá pública como privada, les instrucciones pa efectuar la reválida de 6º que, con calter xeneral, va realizase’l día 15 de xunu.
El Principáu decidió cuntar col sofitu del profesoráu propiu de los centros pa desaniciar los efectos negativos qu’implica esta prueba, prevista na Llei Orgánica pa la Meyora de la Calidá Educativa (LOMCE) y a la que’l Principáu siempres s’opunxo al considerar que nun ye necesariu revalidar la evaluación que realicen el profesores con un exame esternu. Alonso tamién avanzó que’l test va realizar nun solu día, y non en dellos, como asocede n’otres comunidaes autónomes, coles mires d’interferir lo menos posible nel desenvolvimientu habitual de l’actividá lectiva.
El titular d’Educación, que calificó de “estériles” les reválides impuestes pol Gobiernu de Mariano Rajoy, incidió en qu’Asturies va cumplir cola normativa. “Pa nós nun cumplir cola llei nun ye una cuestión democrática”, sorrayó.
¿Cómo tán diseñaes les pruebes?
Les pruebes van realizar en papel y acordies con un manual ellaboráu pola Conseyería d’Educación y Cultura. L’Alministración educativa va unviar a los centros un modelu, que foi afechu en función del diseñáu pol Ministeriu d’Educación, Cultura y Deporte pa los territorios de Ceuta y Melilla. van midise la competencia llingüística, matemática y ciencia y tecnoloxía.
¿Cuándo se va celebrar?
La reválida va desenvolvese, con calter xeneral, na mañana del día 15 de xunu y va durar unos trés hores. Nel casu de que los centros nun puedan entamar la prueba nesa fecha, van proponer otra pa la so realización.
En concretu, van emplegase 85 minutos pa midir les competencies en comunicación llingüística en llingua castellana. Darréu, va haber un descansu d’unos 20 minutos y van dedicase otros 80 pa les pruebes de matemátiques y de ciencia y tecnoloxía.
Revisión y corrección
El tutores de 6º de Primaria van collaborar na aplicación de les pruebes y van realizar una revisión previa de los cuadiernos completaos pol alumnáu.
La comisión central d’evaluación va ser la responsable de la calificación final del alumnáu. Esta comisión va tar presidida pol director xeneral d’Ordenación Académica ya Innovación Educativa, Francisco Llaviana, y compuesta por personal adscrito al Serviciu d’Evaluación Educativa. Tamién va cuntar con personal docente esternu a los centros.
La comisión formada na conseyería va ser la responsable final de la corrección de los cuadiernos y, poro, la encargada d’emitir les resultancies definitives.
¿Quién va disponer de la información?
La información coles resultancies individuales de cada alumnu va unviar dende la conseyería a los centros docentes, que van ser los encargaos de treslladar a les families el correspondiente informe.
Amás, Educación va apurrir a los centros, mientres la primera quincena del mes d’ochobre, les resultancies globales en caúna de les competencies y la so comparanza al respective de la media global d’Asturies. Tamién se van incluyir les resultancies en relación col contestu social, económicu y cultural del centru.
Les direcciones de los centros van informar al Conseyu Escolar, a la Comisión de Coordinación Pedagóxica y al claustru de profesoráu de les resultancies llograes. Una vegada analizaos los informes, van ellaborar planes de meyora.