La xunta xeneral de la Compañía pa la Xestión de Borrafes Sólides d’Asturies, Sociedá Anónima Unipersonal (Cogersa SAU), presidida pola conseyera d’Infraestructures, Ordenación del Territoriu y Mediu Ambiente, Belén Fernández, aprobó güei la cuenta añal del exerciciu 2015, nel que se llogró un beneficiu dempués d’impuestos de 3.437.295,64 euros. La sociedá ye propiedá del consorciu del mesmu nome, esto ye, de los 78 conceyos asturianos y de l’alministración autonómica. Nel grupu empresarial figuren, amás, la sociedá filial Proteínes y Grases del Principáu Sociedá Anónima (Proygrasa) y una participación del 50% nel accionariado de la empresa Bioastur Agrupación d’Interés Económicu (Bioastur AIE).
La resultancia del exerciciu 2015 ye llixeramente inferior a los 3.443.937,23 euros de 2014. L’importe de la cifra de negocios xubió a 37.127.878,15 euros qu’equivalen a un 5,1% más que l’añu anterior (35.325.798,59 euros nel 2014). La resultancia d’esplotación aumentó un 15,8% p’asitiase en 3.391.786,59 euros, frente a los 2.926.863,76 euros de 2014; pero menguó notablemente’l beneficiu d’orixe financieru al pasar de 814.251,36 euros a 170.742,36 euros.
El 58% de los ingresos de Cogersa SAU (21.551.546,22 euros) ta rellacionáu cola recoyida y tratamientu de borrafes non peligroses. Nellos inclúyense la retirada y tresporte de la basura urbana hasta Serín o hasta los nueve aparques de tresferencia, un serviciu que’l consorciu realiza en 40 conceyos y el depósitu nel vertideru de La Zoreda, pero tamién otros servicios como’l tratamientu de folles de depuradora que s’empresta al consorciu d’agües Cadasa y los restos non peligrosos d’orixe empresarial.
La recoyida separada de borrafes y la so clasificación pal reciclaje representa’l 16,5% de l’actividá económica de Cogersa, un total de 6.129.253,42 euros. Per otru llau, la vienta de materiales reciclaos supunxo ingresos de 2.862.434,71 euros, casi’l 8% del total.
Na cuenta de perdes y ganancies destaquen unos gastos de 1.033.566,28 euros en midíes pa embrivir y controlar l’impactu ambiental de les instalaciones de tratamientu de borrafes, con acciones rellacionaes cola depuración de lixiviados; analís d’agua, aire y suelos, o’l control del ruiu.
Nel mesmu estremáu de gastos rellacionaos col mediu ambiente tán les provisiones pa cubrir nun futuru, y mientres más de 30 años, los gastos de caltenimientu y clausura que van xenerar los trés vertideros que Cogersa esplota una vegada fueren cerraos al usu. El Real Decreto 1481/2001 de 27 d’avientu, pol que se regula la eliminación de borrafes por aciu depósitu en vertideru, establez qu’estes reserves son obligatories y la sociedá pública dedicó a les mesmes un total de 3.851.268 euros en 2015, que alcen la cantidá total provisionada a 66.451.176 euros pa los depósitos de borrafes non peligroses (valle de La Zoreda), borrafes peligroses y borrafes de construcción y baltadera.
La xunta d’accionistes alcordó aplicar la resultancia del exerciciu a reserves, de forma que a 31 d’avientu la cuantía total del patrimoniu netu sería de 51.710.835,97 euros (48.277.272,73 euros en 2014).
Aumenta la llegada de borrafes
Coles mesmes, per segundu añu consecutivu Cogersa rexistró una xubida nel total añal de borrafes que lleguen al Centru de Tratamientu de Serín. A lo llargo de 2015 contabilizáronse 839.470 tonelaes, un 9,28% más qu’en 2014. La medría foi especialmente significativu nel casu de les borrafes de construcción y baltadera, qu’aumentaron casi un 28% si comparen les 135.666 tonelaes de 2014 coles 173.445 tonelaes d’esti últimu añu. Los restos peligrosos que van a les plantes de tratamientu físicu-químicu y de estabilización antes del so depósitu nel vertideru de seguridá aumentaron un 24,6% al pasar de 28.795 tonelaes en 2014 a 35.869 l’añu pasáu.
Nel llau opuestu, son significatives les baxaes d’un 9,5% na llegada de borrafes hospitalaries de riesgu que’l so destín ye la planta d’incineración y de los restos vexetales y cuchos que lleguen a la nave de compostaje, y qu’escayen un 6,6%.
Cogersa destinó a preparación pal reciclaje, al compostaje o a la valorización enerxética (incineración con aprovechamientu del calor pa xenerar eletricidá) el 31,33% de les borrafes totales recibíos, esto ye, 262.977 tonelaes, que son un 12% más que les 234.670 tonelaes recuperaes en 2014.