El conseyeru d’Educación y Cultura, Genaro Alonso, suscribió güei la renovación, per cuartu añu consecutivu, del conveniu de collaboración cola empresa Leroy Merlin pa la convocatoria de beques formatives qu’ameyoren l’insertamientu llaboral del alumnáu de Formación Profesional (FP). L’alcuerdu, qu’hasta la fecha tenía calter temporal, pasa agora a ser indefiníu.
Al actu de la firma asistieron tamién el director xeneral d’Enseñances Profesionales y Aprendizaxe Permanente, Manuel Capellán, y el directores de les tiendes que la compañía tien n’Uviéu, Alberto Baizán, y Xixón, Pablo Vega.
Esta iniciativa escuerre un triple oxetivu: fomentar la cooperación por que los estudiantes puedan realizar na empresa’l módulu profesional de Formación en Centros de Trabayu en condiciones óptimas, impulsar la realización de práctica per parte del alumnáu que remate esti cursu los sos estudios en centros sosteníos con fondos públicos, y favorecer l’actualización de conocencies del profesoráu al traviés d’estancies formatives na empresa.
El conveniu preve que se lleve a cabu una convocatoria añal de beques, qu’esti cursu van xubir a 35, y que va abonar la empresa. Les ayudes van dir dirixíes a estudiantes matriculaos nel segundu cursu de ciclos de FP en centros sosteníos con fondos públicos, mayores de 16 años y qu’acrediten una nota media mínima de siete punto.
Con estes beques premia l’esfuerzu del alumnáu con meyores espedientes académicos y facilítase el so accesu al mundu profesional de la que s’ameyora la so cualificación. Van Poder realizase práctiques rellacionaes col comerciu nes instalaciones de Leroy Merlin allugaes n’Uviéu y Xixón mientres se recibe formación teórica en cursos impartíos polos miembros del comité de dirección de caúna d’estes tiendes.
La estancia na empresa tien una duración de dos meses y mediu (del 1 de xunetu al 15 de setiembre de 2016), con una xornada de cinco hores diaries en veces de mañana o tarde, cinco díes a la selmana, de llunes a sábadu, de los cualos una xornada completa va dedicar a la formación teórica.
El númberu de participantes xubió a 37 en 2014 y a 24 en 2015. El plan formativu ta retribuido con una beca de 350 euros mensuales pa cada participante.