El Principáu va sumase al protocolu de collaboración llingüística que caltienen dende va años les comunidaes de País Vascu, Cataluña, Baleares y Galicia, y al qu’agora s’incorporen tamién Navarra, Valencia y Aragón, pa defender los intereses del multillingüismu y intercambiar bones práctiques. Tamién se busca impulsar midíes de protección y usu de les llingües, amás de promover la implicación del Estáu nos llabores de normalización.
El determín d’ampliar esti protocolu tomóse nel I Seminariu de Direcciones Xenerales de Política Llingüística del Estáu, celebráu esti mes en Valencia y al qu’asistió’l director xeneral de Planificación Llingüística y Normalización, Fernando Padilla Palicio.
El Principáu participó na Feria de los Idiomes entamada pol Gobiernu valencianu pa fomentar la llingua asturiana y acudió tamién al congresu L’apueste pol multillingüismu. 15 años de marcu européu común de referencia y el porfoliu européu de les llingües. Nel marcu d’esi alcuentru celebróse’l seminariu de Política Llingüística, al qu’acudieron representantes de Cataluña, Baleares, País Vascu, Galicia, Navarra, Comunidá Valenciana, Aragón y Asturies.
Les comunidaes alcordaron entamar polo menos dos sesiones de trabayu al añu y decidieron tamién que la próxima se celebre n’Asturies.
El Principáu presentó na Feria de los Idiomes un estand onde s’amosaron creaciones lliteraries y musicales en llingua asturiana y gallego-asturianu, amás de material editao pola Conseyería d’Educación y Cultura pa favorecer la normalización llingüística.
La temática del congresu resultó bien útil pal desenvolvimientu del trabayu que lleva a cabu’l Principáu d’Asturies, qu’anguaño ta adaptando los niveles de conocencia del asturianu al Marcu Européu Común de Referencia de les Llingües.