Gonzali Producciones anunció esti xueves que va faer el doblaxe en llingua asturiana del llargumetraxe ‘And Then There Were None’, dirixíu en 1945 por René Clair, y protagonizáu por Walter Huston, Roland Young, Louis Hayward, June Duprez, Barry Fitzgeral, C. Aubrey Smith, Judith Anderson, Mischa Auer, Richard Haydn, Queenie Leonard y Harry Thurston.
Según esplica la productora nuna nota de prensa, esta ye l’adaptación cinematográfica primer, y bien fiel, de la conocida novela policiaca de Agatha Christie ‘Ten Little Niggers’. Presenta la hestoria de diez persones convidaes a pasar la fin de selmana en una casona na remota Isla del Negru. Toos recibieren la invitación del misteriosu señor Owen, al que naide conoz, pero que per mediu d’una grabación va acusar individualmente de ser responsables de crímenes del pasáu. Dende esi momentu empieza la sucesión d’asesinatos.
El versionado, que n’asturianu se llamará ‘Diez negrinos’, va tar fechu en parte por alumnos de la promoción primera de la Escuela de Doblaxe d’Asturies y va tar dirixíu por Illán Gonzali. Coles mesmes, Gonzali Producciones tamién va doblar al castellán esti títulu.
La productora ye responsable del doblaxe profesional n’asturianu dende 2010, con 16 trabayos realizaos hasta agora, ente los que destaquen ‘Los viaxes de Gulliver’ (2010), ‘El tercer home’ (2011), ‘McLintock’ (2011), ‘La nueche de los muertos vivientes’ (2012), ‘La cara impenetrable’ (2013) o ‘Harry el puercu’ (2014); estos dos últimos, emitíos delles vegaes pola Televisión del Principáu d’Asturies.