La conseyera de Agroganadería y Recursos Autóctonos, María Jesús Álvarez, y el director territorial de “la Caixa” n’Asturies y Castiella y Llión, José Manuel Bilbao, presentaron esta mañana la renovación del conveniu de collaboración pal desenvolvimientu d’actuaciones de caltenimientu de la biodiversidá nel Principáu y los nuevos proyectos que se van llevar a cabu nos espacios naturales d’Asturies, a los que la entidá financiera va destinar 250.000 euros.
Les bones resultancies del programa de la Obra Social “la Caixa” Caltenimientu y meyora de les árees naturales y l’insertamientu de persones en riesgu d’esclusión, que se desenvuelve en collaboración col Gobiernu d’Asturies, motivó qu’un añu más se siga trabayando na execución d’actuaciones pa la protección, caltenimientu y meyora del mediu ambiente que, coles mesmes, faciliten tamién l’accesu al mundu llaboral de colectivos que presenten mayores dificultaes pal so insertamientu.
Nesti nuevu conveniu van participar 25 persones en riesgu d’esclusión social, polo que se da prioridá a aquelles actuaciones que precisen d’una elevada mano d’obra y contribúin al caltenimientu de la redolada natural nes zones de mayor valor ambiental. Les actuaciones a desenvolver son les siguientes:
•Parque Natural de Somiedu. van llevar a cabo trabajo de caltenimientu manual de siendes, restauración y adecuación del hábitat, nos que se van invertir 48.000 euros.
•Parque Natural de Redes. van desenvolvese trabayos de caltenimientu y meyora de siendes, con una inversión de 52.000 euros.
•Parque Natural de Fontes del Narcea, Degaña y Ibias. va realizase caltenimientu y meyora manual de siendes, según actuaciones de señalización, restauración y adecuación del hábitat, lo que supon una inversión de 48.000 euros.
•Parque Natural de Ponga. Pa la meyora y caltenimientu de dos tales van destinase 47.000 euros.
•Parque Natural Ubiñas-La Mesa. van realizase trabayos de caltenimientu y meyora manual de siendes, según actuaciones de señalización, al pie de la restauración y adecuación del hábitat, lo que supon una inversión de 55.000 euros.
Nel casu del caltenimientu y meyora manual de siendes, amás de la llimpieza de les mesmes, van executase trabayos nes más utilizaes polos visitantes qu’alleguen a estos espacios y tamién n’otres qu’utiliza’l personal del parque natural, lo que va redundar nuna meyora de los llabores de vixilancia. Tratar d’un llabor de continuidá de les campañes anteriores.
Los trabayos de señalización de siendes inclúin un llevantamientu por aciu GPS del percorríu del camín y de la localización de los puntos y señales (marcáu previu), lo que va facilitar el so usu per parte de los visitantes de los parques naturales.
Les actuaciones de restauración y adecuación d’hábitat consisten principalmente na adecuación del espaciu físicu (llimpieza o retirada de material inerte), tratamientos de meyora de suelu ellí onde sía precisu y plantíu, namá puntual, d’exemplares arbóreos, arbustivos o herbales propies del llugar, según adecuación de la vexetación presistente por aciu fradadures o escardas.
Balance
Mientres los cinco convenios de collaboración suscritos, la Obra Social “la Caixa” invirtió un total 6,6 millones d’euros na meyora de zones naturales n’Asturies, con especial incidencia na restauración de les zones degradaes de los espacios naturales.
Los proyectos constitúin un claru exemplu d’integración y collaboración ente l’alministración pública y l’empresa privada. Amás, d’acordies cola política xeneral de la Obra Social “la Caixa”, toles empreses que participaron na execución de los proyectos contrataron a persones en riesgu d’esclusión social.