El conseyeru de Sanidá, Faustino Blanco, convidó güei a numberosos espertos en biomedicina a visitar el llaboratoriu de medicina del nuevu Hospital Universitariu Central d’Asturies (HUCA), al que se refirió como unu de los más avanzaos del país. El titular de Sanidá inauguró güei les xornaes científiques nes que participen ocho ponentes pertenecientes a la vanguardia mundial de la biomedicina.
“Cuntamos con un llaboratoriu de medicina con un espaciu común de más de 3.000 metros cuadraos de superficie, capaz de procesar 2.000 amueses diaries, lo que lo convierte n’unu de los más avanzaos del país. Dispon d’una organización bien innovadora n’España, que se lleva desenvolviendo dende va años n’Estaos Xuníos, Canadá, Alemaña, Reinu Uníu y Australia”, valoró.
El conseyeru esplicó que’l llaboratoriu ‘Core’ acueye les pruebes más frecuentes del centru de diagnósticu biomédico y va disponer d’una zona preanalítica robotizada, que va impulsar el saltu d’un llaboratoriu con solicitú en papel a unu con solicitú electrónica. Estos nuevos equipos dexen que munches de les pruebes que se taben unviando fora d’Asturies por non disponer de la tecnoloxía necesaria puedan realizase yá nel hospital.
El llaboratoriu de medicina del HUCA, constituyíu n’área de xestión clínica va cuatro años, concentra ensin restar identidá toes los llaboratorios qu’agora tán estremaos en distintos edificios, como ye’l casu de la unidá de xenética y los servicios de bioquímica, inmunoloxía, microbioloxía, oncoloxía molecular y el llaboratoriu d’hematoloxía. Esti modelu parte d’una serie d’árees tresversales que son comunes a tolos llaboratorios: el denomináu llaboratoriu ‘Core’ y les árees calidable, docencia, investigación, recepción d’amueses, alministración y tecnoloxíes emerxentes.
Ponencies y visites empuestes
Na xornada que se celebra güei participen el profesor Ladenson, de St. Louis, (Missouri), padre del biomarcador de diagnósticu d’infartu agudu de miocardiu y estudiosu d’un biomarcador del alzheimer; el doctor Apple, de Minneapolis (Minnesota), espertu n’evaluación de marcadores de síndrome coronariu agudu y insuficiencia cardiaca y en toxicoloxía forense; el profesor Jalife, de Ann Arbor (Michigan), líder mundial nel estudiu d’arritmies cardiaques y bien venceyáu a Asturies, y el doctor Piris, xefe de serviciu d’Anatomía Patolóxica del hospital Marqués de Valdecilla.
Mañana van dase cita nel HUCA el profesor Plebani, catedráticu y xefe del llaboratoriu de medicina del hospital de Padova, Italia; el profesor Tim Goodnough, de California, director del Serviciu de Tresfusión de la Universidá de Stanford; el profesor Eleftherios Diamandis de Toronto, Canadá; y el profesor Carlos Martínez, presidente del Conseyu Cimeru d’Investigaciones Científiques (CSIC) de 2004 a 2008.
Tanto esta tarde como mañana van ufiertase visites empuestes al hospital, nes que los asistentes a les xornaes van tener la oportunidá de conocer el diseñu y dotación tecnolóxica del nuevu hospital.