El Parlamentu asturianu volvió refugar l’almisión a trámite y consiguiente alderique de la reforma del impuestu de Socesiones y Donaciones, tal como solicitaba’l Partíu Popular. PSOE, Podemos ya IU reprocharon al PP que trate d’eliminar «cualquier progresividá fiscal» y de buscar favorecer namás a aquellos que más tienen, mientres que Foru y Ciudadanos votaron a favor d’aldericar na Xunta la reforma propuesta de los populares.
La d’esti vienres nun foi nin tanto la primer iniciativa que’l grupu parlamentariu del PP lleva al Plenu pa tratar de modificar l’impuestu de Sucesiones y Donaciones, pero una vez más los grupos de la izquierda criticaron a los ‘populares’ por tratar de beneficiar namás a les rentes altes.
La diputada del PP, Emma Ramos, calcó en que lo que pretende’l so grupu ye abrir la puerta a un diálogu tranquilu y al alderique sobre una posible reforma del impuestu de Socesiones y Donaciones porque a la sociedá asturiana interésa-y esti alderique.
«Vamos lluchar reiteradamente pa consiguir que los asturianos paguemos menos impuestos polo xeneral y nun falamos d’una baxada de tolos impuestos sinón d’una forma fiscal selectiva», insistió Ramos, que destacó que nun se trata de «una cuestión ideolóxica como trata de vender el PSOE, sinón d’una defensa de los intereses de los ciudadanos».
La diputada de Foru, Cristina Coto, indicó que la posición del so grupu sobre esti asuntu ye de sobra conocida y asina se recoyía nos sos programes electorales nes que s’abogaba pola eliminación d’esti tributu.
Coto volvió recordar la discriminación fiscal a la que se ven sometíos los asturianos y les consecuencies de la mesma, con más del triple de renuncies a herencies nos últimos años y les munches desllocalizaciones d’empreses del Principáu.
Dende Ciudadanos, Ignacio Prendes, indicó que’l so grupu considera qu’hai razones fundamentaes pa tratar una reforma d’esti impuestu y un datu incontestable que nun ye otru qu’Asturies ye la Comunidá Autónoma que presenta mayor presión fiscal con esti impuestu.
«Tal como ta configuráu n’Asturies esti impuestu ye manifiestamente inxustu», manifestó’l diputáu de C’s, qu’añadió que la postura del so grupu frente a esta cuestión ye bien clara y apuesta por una homoxeneización d’esti impuestu a nivel estatal y una harmonización del mesmu cola baxada al respective de la tarifa que se fixa n’Asturies o’l mínimu exentu na rexón.
POSICIÓN DE LA IZQUIERDA
La diputada del PSOE, Margarita Vega, llamentó que la propuesta del PP tea llena de «tópicos y xeneralidaes» amás de «mostrar desconocimientu sobre la realidá del Principáu». Asina coincidió col restu de grupos de la izquierda en destacar que lo que busca’l PP ye namás favorecer a les families más adineraes.
Los socialistes consideren «claramente regresives» les propuestes del PP que «namás beneficien a les categoríes más altes, perxudicando a los que yá gocen a una bonificación del cien por cien». «Nada hai na so propuesta pa beneficiar a les families medies», dixo Vega, que reconoció que magar ye ciertu que l’impuestu requier cambios les mesmes diríen en dirección contraria a lo propuesto pol PP.
Pa Podemos, según el so diputáu Enrique López, lo que se plantega ye eliminar 140 millones d’euros de la recaudación sin que s’esplique como se pagaríen los servicios que la xente realmente precisa. Asina indicó que la posición del so grupu sigue siendo la mesma: defendemos un impuestu de socesiones que seya realmente progresivu acabando cola confiscación que supón l’actual error de saltu.
Asina dixo que cola propuesta del PP namás se veríen beneficiaes «les herencies de ricos», dao que pa les herencies modestes planteguen una baxada de 3 euros y pa una herencia d’un millón d’euros rebaxaríenlos 12.000 euros. «Amás por si eso fuera poco proponen una bonificación del 99%, dinamitando cualquier progresividá», dixo López, qu’acusó al PP de ser lo creadores de los trabayadores probes d’esti país» y consideró «un escándalu la propuesta del PP.
El voceru d’IU, Gaspar Llamazares indicó qu’al so grupu nun lu fadia nin cánsa de nenguna manera esti debete pero sí-y molesta escluyir del mesmu al 95 por cientu de los asturianos que nun paguen esti impuestu. «Lo que-yos molesta a ustedes ye que s’una esti alderique al alderique de la desigualdá, eso ye lo que nun-yos presta», indicó Llamazares.
Asina, Llamazares insistió en que nel so grupu tán dispuestos a falar d’esti impuestu con dos condiciones: caltener la progresividá y que’l que más tenga más pague y caltener la recaudación na CCAA. «Ustedes pasen del error de saltu al horror de la so intervención obligando a pagar al 95% que ta exentu y al 5% que yá paguen baxalu», dixo.