La Conseyería d’Educación y Cultura celebra la séptima edición del Día de les Ciencies Asturianes con dos actividaes divulgatives. Na primera, el científicu Amador Menéndez Velázquez va presentar la ponencia Desafíos tecnolóxicos de la nuestra era nel Real Institutu d’Estudios Asturianos esti xueves 9 de payares a les 19:30 hores. Nella va presentar les posibilidaes qu’ufierta la tecnoloxía como aliáu a la hora d’encarar dalgunos de los problemes y retos más importantes de la humanidá. Esti investigador asturianu ye doctor en Química pola Universidá d’Uviéu y trabaya na actualidá nel Institutu Tecnolóxicu de Materiales d’Asturies (ITMA), depués de pasar pel Conseyu Superior d’Investigaciones Científiques, el Llaboratoriu Européu de Radicación de Sincrotón, el Centru d’Investigación en Nanomateriales y Nanotecnoloxía (CINN) y l’Institutu Tecnolóxicu de Massachusetts (MIT), onde, con otros cinco profesionales, estableció’l récord mundial d’eficiencia na captura d’enerxía solar. Llogró bien de reconocimientos como’l Premiu Européu de Divulgación Científica (2013) o’l Premiu Xovellanos d’Ensayu 2017 pol so llibru Historias del futuro. La era del Homo Tecnológicus.
El vienres 10 de payares van ser los escolares de los centros educativos del C.P. El Vallín y del IES Isla de la Deva, en Piedrasblancas (Castrillón), quien van participar nuna charla divulgativa al cargu de Víctor Suárez Piñero, alministrador y divulgador del proyectu d’enciclopedia llibre Wikipedia n’Asturies. Col títulu Wikipedia: un universu d’oportunidaes, va presentar en dambos centros escolares esti proyectu que yá cunta con más de 53.000 artículos n’asturianu. L’oxetivu xeneral ye dar a conocer Wikipedia y ufiertar recursos pa promover una participación activa nel mesmu, que non solo implica la edición o llectura crítica, sinón una construcción sobre les maneres de ser y de tar na cultura dixital al traviés de la cultura llibre. L’usu y la creación de conteníos baxo llicencia llibre n’aula lleva implícitu’l fomentu dientro del ámbitu educativu d’una ciudadanía dixital comprometío colos sos derechos y deberes.
El Día de les Ciencies Asturianes coincide cola celebración nesti mes de payares del Día Mundial de la Ciencia pa la Paz y el Desenvolvimientu. Esta cita mundial ufierta la posibilidá d’amosar la importancia de la ciencia na nuestra vida diaria y alimentar el debate sobre les cuestiones científiques, averándose a la sociedá. Col lema d’anguaño, Una ciencia pal entendimientu mundial, búscase amosar la so importancia pa la paz y el desenvolvimientu sostenible, porque promueve’l compromisu de los individuos y les comunidaes locales pa compartir el conocimientu col que llograr un cambéu nos nuestros comportamientos.